Сёлетняе размеркаванне ў чарговы раз пацвярджае, што педагогіка па-ранейшаму з’яўляецца жаночай прафесіяй: сярод маладых настаўнікаў толькі два мужчыны. У мінулым годзе, дарэчы, іх было больш – ажно восем спецыялістаў-мужчын прыбылі ў раён. Сёлета 27 маладых педагогаў маюць мэтавае накіраванне, а гэта значыць, што на педагагічнай ніве Ашмяншчыны ім прыйдзецца працаваць як мінімум 5 год. Радуе той факт, што амаль 78 працэнтаў настаўнікаў і выхавацелеў – ураджэнцы нашага раёна, а гэта дае надзею на тое, што яны застануцца на радзіме, а не раз’едуцца пасля абавязковай адпрацоўкі. Большасць педагогаў распачне сваю працоўную дзейнасць ва ўстановах адукацыі горада (61, 4 працэнта). Калі аналізаваць маладое папаўненне з боку прафесійнай прыналежнасці, то 9 з іх маюць дыпломы з дашкольнай адукацыяй, значная колькасць размеркавана да нас псіхолагаў — ажно 7, настаўнікаў замежнай мовы — 5. А вось настаўнік матэматыкі, у якіх адчуваецца недахоп па ўсёй рэспубліцы, прыйшоў да нас толькі адзін.

 Аб тым, што маладым педагогам у нашым раёне заўсёды рады, сведчыць традыцыйнае ўрачыстае ўручэнне працоўных кніжак з запрашэннем кіраўніцтва раёна. Галоўны спецыяліст аддзела адукацыі Тамара Сахарчук заўсёды імкнецца да таго, каб зрабіць гэта мерапрыемства сапраўдным святам, падчас якога моладзі было б утульна і спакойна, каб педагогі з першых дзён працоўнай дзейнасці адчулі сябе патрэбнымі ў сістэме адукацыі раёна.